своими руками
seo
Labau (History) PDF Print E-mail
Tuesday, 16 September 2014 07:46

JINGHPAW WUNPAWNG CHYUM DAKKASU A LABAU KADUN

Jinghpaw Wunpawng Hkalup Hpung nnan de wa ai aten hta nawku hpung hpe woi awn na ningbaw ningla ni shangai shapraw na ra wa ai. Dai majaw, 1901 ning hta Sarakaba Ola Hanson gaw Chyum jawng n nga timung Jinghpaw hte Kayin sara ni a matu Chyum ga kadun sharin nna tara hkaw hpaji ni hpe Myitkyina, Manmaw, Nan Hkam hkan e sharin lai wa sai. 1923 ning hta gaw Chyum jawng kaji ngu nna shawng hpaw chyam yu ai. Dai jawng hta Manmaw na marai 2 hte Namhkam na marai mi sa lung lai wa sai. Sarakaba Sword mung Namhkam e Chyum jawng kaji langai mi hpaw lai wa ai hte dai jawng hta jawngma marai 4 sa du sharin lai wa sai. Ndai ni gaw dai aten e hkyak hkyak ra kadawn ai majaw, hpaw ai jawng ni rai nga ai.

1930 ning October shata gaw Chyum jawng a labau hta lak lai ai shani rai nga ai. Hpa majaw nga yang Myen mung Hkalup Hpung Mung Zuphpawng hpe Yangon mare Cushing High School jawng wang e galaw ma ai. Dai kaw Myitkyina hku nna dat kasa hpaji du Sara Robin, Manmaw de na Pangmu Duwa Sara Lahpai Zau Tu, Sam mung de na Sara Labya De ni rai ma ai. Sara Lahpai Zau Tu gaw, chyum jawng hpaw ya na matu a ja a wa hpyi shawn mu ai. Dai kaw nna Chyum jawng hpaw sa wa na masing hpang wa sai hpe chye lu ai.

Dingla nna hkring sa mat sai Sarakaba George J. Geis hpe bai shaga shatsam ma ai. Dai hte maren Sarakaba Geis yan Ma Ma mung 1931 ning hta Manmaw de du lung wa sai. Shawng ningnan Manmaw kaw Chyum jawng shara lata ma ai. Sarakaba Geis hte Sara Zau Tu lata tawn ai shara gaw Sinlum Pangmu makau na Hpunggan kawng re ai lam chye lu ai. Rai tim, dai shara hpe n shagrin la lu ai. Jahtum e 1932 ning June praw 1 ya shanin Manmaw mare sasana jawng wang na Sarakaba Geis a nta hta Chyum laika sharin jawng wang na Sarakaba Geis a nta hta Chyum laika sharin jawng hpaw hpang lu masai. Dai shaloi Jawngma 9 shawng sa du sharin hpang ma ai. Dai ni gaw: Manmaw na marai 3, Sam mung na marai 4, Myitkyina na marai 2 rai ma ai.

 

1. Lahkawng Ning Pang (1934-1959)

1934 ning April shata 15 ya hta lahta Sam Mung, Kutkai mare kaw bai matut hpaw nna lahkawng ning sharin ai pang hpe hpaw tawn lu sai. 1934-1959 ning du hkra lahkawng ning pang du hkra sharin ai hpe chye lu ai. Ndai pang hta gaw kabu gara shiga sakse hkam ai lai ladat hte tara hkaw hpaji ni hpe madung tawn nna sharin ya ai re. Sasana majen je ai grau nna gaw, nat hkyawt aten rai nga ai. Dai majaw, asak hkrung lam hte seng nna wenyi lam hta sha n ga hkum hkrang asak hkrung lam rai nga ai kan bau bungli ni hpe mung kalang lata sharin ya ai ten rai nga ai. Dai aten hta sharin ai subjects ni gaw: Ga Shaka Dingsa, Ga Shaka Ningnan, Hpung a ahtik labau, Tara hkaw hpaji, kabu gara shiga sakse hkam ai lai ladat, hkai sun hpaji, jawng sara tai hpaji, tsi mawan hpaji, hte ta hpaji, rai chywi rai rep hpaji ni ra nga ai. 1942 ning March shata du hkra sha jawng hpaw lu ai. Japan prat du wa ai majaw jawng hpe masum ning pat kau ra sai. 1946 ning Apri. shata hta jawngma marai 9 hte jawng bai hpaw lu sai. 1950 ning kaw nna gaw tsang 7 awng sai ni hpe Chyum jawng hkap la ai madang du hkra sharawt lu sai.

 

2. Masum Ning Pang (1960-1973)

1960 ning hta gaw, 3 ning sharain ai pang hpe bai sharin sai. 1966 ning hta Chyum jawng hpe Myikyina Ginwang Nawng Nang e htawt la nna matut sharin sa wa sai. Ndai pang hta gaw hpung shte seng ai myit jasat lam ni, chyum masa hpaji ni, Hpung labau ni hpe grau n gun dat nna sharin sa wa sai.

 

3.  Mali Ning Pang (1974-1998)

1974 ning hta gaw, 4 ning diploma madang hpe sharawt lu saga ai. Layman course hpe mung 1976-1977 ning kaw nna hpaw hpang lai wa sai. 1983 - 1984 ning hta Layman course hpe jahkring kau sai. 1986 ning kaw nna gaw, L.Th madang hpe lu hpaw hpang lai wa saga ai. 1990 June shata praw 20 ya shani Hkawlik madang hpaw na matu ahkang lu sai re. Dai majaw dai shaning kaw nna gaw, B.Th hpaji hpe sharin lu saga ai.

Ndai madang du hkra du lu ai gaw, 1977 ning Jaw Masat Poi kaba ngut ai kaw na du na 15 ning hta Hkawlik hpaw lu wa na masing jahkrat myit sharawt shajin lai wa let 1983 ning hta galaw lai wa sai Chyum jawng 50 ning Jubili kaba hta Chyum Hkawlik madang sharawt sa wa na lam hta grau n-gun dat hkrang shapraw daw dan sa wa ai majaw, rai nga ai.

1994 ning hta gaw yawng a shawng na Jinghpaw Wunpawng Chyum Hkawlik kaw nna shagrau ai B.Th janmau jaw ai jawng yu poi kaba hpe Dap Kawng Buga Hkalup Hpung hta galaw lu saga ai. Jawngma marai 7 jawng yu lu sai. 1996-1997 ning kaw nna gaw M.Div pre-class marai 3 lung la hpang nna 1997-1998 jawng lung shaning hta e M.Div course sharin hpang sai. 1998 ning kaw nna gaw Kutkai Chyum Jawng mung Chyum Hkawlik a jawng lakying tai wa sai. Ndai Kutkai Chyum Hkawlik kaw gaw, Layman Course, Diploma hte L.Th Jinghpaw hku hpaw hpang lu sai.

 

4. L.Th Hpaw lu ai labau

Chyum jawng hpe Asha dan sin praw dingda ginra Chyum hpaji hpung (ATESEA) de matut lu nna, 1982 ning September kaw nna anhte Jinghpaw Wunpawng Chyum Jawng gaw (ATESEA) a hpung shang malawm tai wa sai.
1984 ning hta Yangon kaw ATESEA accreditation komiti (Chyum jawng masat shagrin komiti) salang ni du ai majaw, Chyum jawng a malai jawng up Rev. Lahtaw Gum Se hte Sara Ja Gun ya sa hkrum ma ai. Accreditation komiti kaw lawm ai ni gaw, Dr. Grover Tyner, Dr. Velantino Sitway, Dr. Ching Feng Hse ni rai ma ai. Ndai Chyum jawng masat shagrin komiti ni hte hkrum shaga ai report hte maren, Jinghpaw Wunpawng Chyum jawng gaw lawan ai hku L.Th hte B.Th course ni hpe hpaw hpang lu sai nga ai majaw ndai bungli hpe galaw hpang wa na komiti lawu de na hte maren hpaw da lu sai.
1. Rev. L. Gum Se
2. Sarakaba Sumlut Naw
3. Rev. Isak (KBC Amu Madu)
4. Rev. Saboi Jum
5. Sara Gun Jawng nin rai ma ai.
Dai majaw 1986 ning kaw nna L.Th program hpe hpaw hpang lai wa lu saga ai.

5. B.Th Hpaw Hpang ai Lam
1988 ning jawng hpaw ai aten kaw nna B.Th pre-class hpang wa saga ngu, S.C 87/83 hte maren dawdan let hpaw hpang wa lu saga ai. B.Th course hpe ATESEA kaw nna (accreditation) masat ya ai lam garai n galaw ai majaw, Insein Inglik Chyum Jawng (MIT) hte matut mahkai (affiliate) let B.Th course hpe hpaw hpang lu saga ai.

 

6. M.Div hte kaga Sharin Lamang ni Hpaw Jat ai lam
ATESEA accreditation hpung ni n gun jaw ai hte maren M.Div course hpe 1996-1997 jawng lung shaning kaw nna jaw hpang wa sai. 2000 ning hta ATESEA kaw nna masat masa jaw ai lam hpe hkam la lu sai. Tsa ban 21 de du shang wa ai hte rau KTC kaw nna Diploma hte L.Th hpe awng la lu wa sai jawngma dingsa ni a hpe mit dum let shanhte a matu lak san program B.Min hpe 2003-2004 jawng lung shaning kaw nna hpaw jat lu saga ai. Dai hte maren 2011 jawng lung shaning kaw nna shaning na na la ding da lai wa sai M.A.C.S hte M.Min sharin lamang ni hpe hpaw jat wa na jin jin rai nga sai.
KTCS a labau hta tsawra hkungga ging ai Jawng Up sara kaba masum nga lai wa ai hpe mu lu nga ai. Dai ni gaw, Rev. Lahpai Zau Yaw (1946-1965); Rev. Dr. Lahtaw Gum Se (1966-1993) hte Rev. Dr. Saga Hkyen Naw (1993-2010) ni rai nga ai. 2010-2011 jawng lung shaning kaw nna gaw, KTCS hta jawng up ningnan hpe bai mu lu saga ai. Dai gaw, Dr. Nalaw Dai Hkawng rai nna shi hpe 36 lang na Hpung shawa zuphpawng hta yawng jawm myit hkrum let lata san dat ai lam rai nga ai. Tsa Ban 21 hta KTC a Chyum hpaji grau nna bawng ring galu kaba jat wa na matut Jawng up ningnan kaw nna woi awn sa wa ai lam hta yawng jawm n gun jaw madi shadaw lawm ra nga saga ai rai nga ai.

 

7. BATS Program Hpaw Hpang ai Lam
Bachelor of Arts in Theological Studies (BATS) ngu ai degree program hpe English hpaji hte Music hpaji hpe madung da nna 2013-2014 jawng lung shaning kaw nna hpaw hpang wa sai. Matut Computer hpaji hte seng ai degree hpe mung hpaw hpang wa lu na matu masing gran nga ai.

Last Updated on Wednesday, 17 September 2014 16:38
 
своими руками